BLIND


Heur man was joaren heer oet tied kommen. t Haar n zet duurd, veurdat zai didde verwaarkt haar. En dou was zai begun veureg joar blind worren. Zai zaag gain niks en gain naks meer.
"Joa," haar zai mie ains verteld, "verlais van mien man het hail wat stoerder veur mie west."
k Haar heur aankeken en dochde:
"Dizze vraauw van negenentachteg joar het ien heur levent al hail wat onnervonnen, moar kloagen dut zai nait. Hou is dat meugelk! Komt dat deur dai vraauw, dai vaaier doagen ien week n uur mit heur aan koiern is?"
t Was mie bekind, dat van gemainte geld kwam om dai vraauw te betoalen. Veul was dadde nait."

k Haar der nait zo bie stilstoan, wat gemainte zo ombogen haar. Op thoeszörg en aalderwegens wer der joa op olle minsken slim beknibbeld. En dou haar k heur noaberske aan lien. Dizzent vertelde mie votdoadelk hou der bie vraauw Veenstroa heergong:
"t Gaait nait zo goud mit vraauw Veenstroa. Zai het van gemainte n braif kregen. Doarien staait, dat gemainte bespoaren mout. Vraauw Veenstroa krigt gain geld meer veur dai vraauw, mit wel zai vaaier moal ien week koiert. Nou komt mien noaberske nait meer noar boeten."
t Was stil aan aaner kaande van liene. Noa n zetje zee zai:
"Vraauw Veenstroa het nog n twaide braif van gemainte kregen. Heur wort touvertraauwd, dat zai n kursus ien Den Hoag volgen kin. Gemainte zel dizzent betoalen. Mien noaberske zel doar leren, hou zai mit n blindegelaaidehond boeten lopen kin. Nou holt zai veul van daaiern, moar op heur leeftied huift zai gain hond meer. Kursuskosten binnen slim hoog. En wat k joe al verteld heb, gemainte betoalt dizzent. Zeg mie nou moar, hou zai mit traain noar Den Hoag kommen mout? As gainent mit heur mit goan kin, din het zai joa zuk n hond neudeg. Dizzent het en wil zai nait. Zuk n kursus volgen, zigt zai hailendaal nait zitten. Wat mout zuk n blinde vraauw nou ien Den Hoag doun?"
t Was weer stil en dou vervolgde zai:
"t Gaait oardeg min mit vraauw Veenstroa. Zai dreumt nou immer en aaltied, dat zai onner n traain vaalt. Zo kin dat doch nait wieder goan!"

"Dat is mie joa n verhoal. Het gemainte wel n gewaiten? Nou lidt dai aarme vraauw deur dai omboegerij van gemainte. Dadde mit dai kursus is joa ten hemelschraaiend," gong deur mien kop.
k Mos noadinken en dou zee k:
"k Zel gemainte wel efkes bellen en k hoop, dat k veur vraauw Veenstroa wat doun kin."
Votdoadelk belde k wetholler van sosjoale zoaken. k Haar hom gaauw te pakken. Hai heurde van mie ien kört situoatsie van vraauw Veenstroa.
Oet mien mond kwam:
"Wat hebben ie bliksiekoater joa blinde ambtenoaren aan waark. Ie zörgen der moar veur, dat didde goud kommen zel. Zo nait, din zel overmörn haile verhoal ien kraanten stoan. Loat ik over flikkerkaast moar swiegen. Hebben ie dadde goud aanvuild. Wat is dat veur gedou. Zuk n kursus ien Den Hoag kost n bult geld. Doarnoa mout vraauw Veenstroa zuk n hond kriegen. Waiten ie, wat dat aal kosten zel? En wel mout vreten veur dai hond betoalen? Dat zellen ie wis en woarachteg nooit nait doun! Geef vraauw Veenstroa dat geld, van dai gevolgen zai weer boeten koiern kin. Dat kost doch veul minner."
"Joa, moar," heurde k wetholler zeggen, "dai sinten mouten oet n lege pot kommen. En din begriepen ie t wel."
"k Nait," kreeg hai van mie te heuren, "ie zörgen der moar veur, dat t regeld wort. k Heb geerne, dat ie mie dat mörn mitdailen. Zo nait, din hebben ie overmörn kraanten over joen beknibbelerij vol stoan."

Aaner dag kreeg k n tillefoontje van hom. t Was veur nkander kommen. k Bedaankte hom vrundelk veur zien muite.

n Dikke week loater trof k vraauw Veenstroa mit n vraauw ien plantsoun aan. n Hond gong mit dai baaident mit. Wie prouten wat mit nkander. t Bleek, dat vraauw Veenstroa nou mit n aaner vraauw op pad was. Dizzent bezat n hond. Zo, was aal doch nog goud kommen. En ien ploats van vaaier kon der nou vief moal ien week en wel mit n hond koierd worren.