Nijs

Nij/Nieuw/Neu/New/Nuevo


t Was joa oardeg hoog, zo te zain! Hou zol der beneden aanbelaanden? Hai kromp wat ienkander. Keek noar boven en sprak mit verheven stem:

“Nomen Iesu est omen. Ille lux veritatis et rex omnipotens imperii sanctorum est. Jesu, qui tollis peccata mundi, miserere mei.”

“Vergemie domie, wat zègt der,” vroug börgmeester.

Domie mos stief noadìnken:

“Bisschop het t nait over Peerd van Ome Loeks. Moar mit hulp van Jaizes komt hai der oet”

“Jaizes, Jaizes, Jaizes...! Dat zai k dòch ook. Peerd van Ome Loeks is widde as snij. En dat is gain waark veur Jaizes, moar veur brandweer, plietsie en eerste hulp bie ongelokken,” roasde börgmeester.

“Salvamur quia credimus in unum Deum vitae. Patrem, Filium et Spiritum Sanctum.”

Lu keken stomgesloagen noar bisschop omhoog. En dòchden:

“t Löpt hom ien kloeten!”

“Gekgòdverdikkemie domie, wat zègt der nou wèl weer?” wol börgmeester waiten.

Hai kreeg gain antwoord, want bisschop was biederhaander mit mond as domie:

“Socii regni victoriae...”

Zien woorden aanders verdwenen ien n roupen en schraiwen.
“Braand, braand, braand...!”